News & Video

Kuerpo Polisial – Abuso kontra gruponan vulnerabel

Kuerpo Polisial a tuma nota ku resientemente tin un app ta bai rònt kaminda por mira klaramente kon dos yu chikí ta wòrdu maltratá i abusá. Na promé lugá, polis ta informá ku e maltrato kruel kontra e dos menornan aki no a tuma lugá na Kòrsou, manera e impreshon a keda duná. Komo kuerpo nos ta sensurá e akto reprochabel aki i ta lamentá ku e app aki a bai rònt riba nos isla kousando hopi konsternashon innesesariamente. Ta bon pa na momentu ku un siudadano risibí tipo di grabashonnan di tal índole, nan drenta den kontakto ku polis pa asina ei averiguá prosedensia di e publikashon.

Sinembargo, no ta laga duda ku den nos komunidat lo tin diferente kasonan di maltrato i abuso tantu físiko komo mental ku ta tuma lugá prinsipalmente kontra di e gruponan mas vulnerabel den nos sosiedat manera muchanan, hendenan di edat i esnan ku un desabilidat físiko of mental. Kuerpo Polisial ke hasi un yamada na tur siudadano ku sea ta eksperensiá, konstatá òf ta na altura di e kasonan aki, pa denunsia e echonan kastigabel aki inmediatamente. Por hasi esaki sea na polis via 917 i 108 (anónimo) pero tambe instansianan ku ta sali na bienestar di muchanan i adultonan mayó. No sea kómplise dor di keda ketu. Pero denunsia pa nos por aktua!