News & Video

Kortometrahe “Sin Ayó” ta bai Canada i Trinidad & Tobago!

E produkshon lokal “Sin Ayó” lo kompetí na Trinidad & Tobago Film Festival, kual ta tuma lugá 18 – 25 di e luna aki. Prome ku esei, e kortometrahe lo sali riba pantaya grandi djaweps awó 13 di sèptèmber durante Caribbean Tales International Film Festival (CTFF). na Toronto, Canada. “Sin Ayó” ta un di e poko pelikula nan ku ta forma parti di CineFam, un kategoria dediká na sineastanan muhe di Karibe.

Sin Ayó tin un tim fuerte di hende muhe su tras ku Gedeona Maduro komo produktor ehekutivo, produktor Sulin Passial i Elizabeth Francisco direktor i eskritor. Passial i Francisco ta biaha pa Toronto awe pa representá e kortometrahe na e festival internashonal. E oportunidat úniko aki lo ofrese e sineastanan oportunidatnan grandi pa partisipá den diferente masterclass, workshop i interkambiá ku profeshonalnan di e industria di sine na CTFF i na Toronto International Film Festival kual tambe ta tumando lugá e siman aki.

E tim tras di Sin Ayó ta gradisi tur sponser ku a hasi partisipashon na Caribbean Tales International Film Festival posibel. Esaki lo no ta posibel sin boso yudansa! Ku gran apresio nos ta gradisí Prins Bernhard Cultuurfonds Caraibisch Gebied, Konsulado General Hulandes na Toronto, Curaçao Tourism Board i Curoil. Pa Kòrsou esaki ta un oportunidat pa kompartí un parti chikí di nos arte i historia ku un oudiensia mas grandi. E sineastanan lo tene un Q&A despues di e pelikula riba 13 di Sèptèmber.

E obra fiktisio ‘Sin Ayó’ ta hiba nos na e mainta trágiko di 6 di Novèmber 1967. E ta dediká na e personanan ku a perde nan bida durante konstrukshon di Brug Juliana.