News & Video

Ekonomia di Kòrsou ta baha ku 1,7 porshento na 2017

Den 2017 e resultado di produkto interno bruto (PIB) ta illustrá ku esaki a sigui baha en komparashon ku e aña anterior. E promé kálkulonan preliminar relashoná ku desaroyo ekonómiko di Kòrsou ta indiká un bahada den aktividatnan ekonómiko ku 1,7 porshento na 2017, ku ta un deterioro ekonómiko mas agudo kompará ku 2016 (-1%). E porsentahenan akí ta reflehá e desaroyo real, ku otro palabra, a koregí nan pa tene kuenta ku desaroyo di preis. Esaki ta Sali na kla for di datonan ku a ser publiká awe pa medio di Ofisina Sentral di Statistik (CBS).

Ta kalkulá kresementu ekonómiko a base di e oumento di volúmen ku tabatin den e proseso di produkshon i a base di e desaroyo koyuntural. E datonan aki ta preliminar, ya ku no ta tur dato di tur ramo di negoshi ta disponibel ainda. E indikadónan ekonómiko ta statistiknan kual ta indiká e posishon aktual di ekonomia den un pais, esaki ta dependé di e área ekonómiko (manera p.e. industria, forsa laboral, komersio etc.).

Aparte di un ekonomia stagná di e último añanan ku Kòrsou a konosé, tambe tabatin un kresementu den desempleo. Aña 2017 a karakterisá komo un aña kaminda tabatin kresementu di desempleo di 14,1 porshento, desempleo bou di hubentut ku 32,8 porshento, un aktividat económiko abou i un tendensia abou di kompra di konsumidornan influensiá pa e inflashon di 1.6 porshento.