News & Video

Brantwer Kòrsou ta firmá akuerdo di kolaborashon entre kuerponan den Reino

WILLEMSTAD –  Djárason 18 di Yüli 2018, ministernan di Hustisia Ferdinand Grapperhaus (Hulanda), Andin Bikker (Aruba), Quincy Girigorie (Kòrsou) i Cornelius de Weever (Sint Maarten) a reuní pa e konferensia ‘Justitieel Vierpartijen Overleg’ (JVO) kual ta tuma lugá kada seis luna. E biaha akí e konferensia a tuma lugá na Boneiru, bou di presidensia di Hulanda. Pa algun tempu kaba, kuerponan di Brantwer di Aruba, isla nan BES, Sint Maarten i tambe Kòrsou a sinta na mesa durante di diferente reunion i tabata mira e nesesidat di kolaborashon entre e kuerponan.

E akuerdo di kolaborashon entre e kuerponan aki, ta duna espasio pa koperashon di trabou riba diferente tereno, tantu di kalamidat i tambe minimalisá rísiko. Orkan Irma ku a pasa na Sèptèmber 2017 na isla di Sint Maarten tabata un punto di lansa fuerte pa mustra ku desaster no ta limitá su mes na frontera, pero ku un kolaborashon riba tereno di kalamidat i krísis ta esensial pa surpasá e kalamidat aki. Tambe a trese e aspekto ku kada kuerpo ta limitá na rekurso humano i ku ta importante pa un akuerdo di kolaborashon pa garantisá e nivel di kalidat di servisio.

Ku e akuerdo di kolaborashon ku a ser firma aki, ta duna espasio pa interkambio di konosementu i eksperensiá entre e diferente kuerponan pa fortalesé di forma kualitativo e labornan entre e diferente kuerponan i tambe pa realisá mihó koperashon pa maneho di kalamidat i krísis. Firmamentu di e akuerdo aki ta impliká kolaborashon, i ku kada kuerpo ta duna su disponibilidat pa e esfuersonan keda realisá, pa logra interkambio riba tereno represivo, preventivo i tambe dor di kursonan i interkambio entre bomberonan di e islanan den reino ku kada kuerpo su mes responsabilidat pa maneho riba su isla.

Na final di JVO e kuater ministernan, den presensia di nan respektivo komandante di brantwer, a firma un akuerdo di kolaborashon entre kuerponan di bombero di Kòrsou, Aruba, Sint Maarten, islanan BES (Boneiru, Saba i Statia). E akuerdo aki ta un akuerdo firma pa un durashon di 3 aña den kual periódikamente lo evaluá e funshonamentu entre e diferente kuerponan di brantwer di e diferente islanan.